Bier-Forum.ch

Am Zapf-Festival hets näbe öppe 50% New England IPAs o viu Saisons gha. Denäbe o es paar Session IPAs und o 1-2 Gose. De isch bi üs am Tisch när o d Frag ufcho, was isch de dr Ungerschid zwüschem ne Session und em ne Saison?


Es Saison isch e eigete Bierstiu. Dä isch im Norde vo Frankriich entstande, wo d Saisoniers si ufem Burehof go ushäufe. Das isch dert ihres Standardbier gsi, es süffigs, trochnigs Bier mit irgendere Wiudhefe vrgore wos haut grad het umegha.

Session hingäge wird hüfig aus Adjektiv füres Bier brucht. Session bedütet eifach, dases weniger Aukohou het, was es Bier "sessionable" macht, aus das me a eim Abe viu devo cha trinke. Z bekanntiste isch äuä z Session IPA. Git abr ou Session Lagers oder Session Stouts (wobi das miner Meinig na, eher irischi Dry Stouts wäre).


Z zwöite was o hüfig zu Verwirrig füehrt isch dr Ungerschid zwüschem autbekannte Gueuze undem widerentdeckte Gose. Es Gueuze isch es beugischs Bier wo nur mit wiuder Hefe vergore wird. Rund um Brüssel het d Luft viu wiudi Hefe und Laktobaziue, de het me nachem Braue eifach über d Nacht d Fänster offegla und hets spontan la gäre. Wird o hüfig mehreri Jahr in Eichefässer glageret.

Z Gose hingäge isch nid eifach e Schribfähler sondern e dütsche Bierstiu us Goslar. Es wird zwar wi ds Gueuze mit em ne Teil Weize braut, isch meistens o suur, abr dr gross Ungerschid isch, dass es o sauzig isch (und traditionell o mit Koriander braut wird).

Da chönnt me eigentlech o no grad über Double/Imperial/Triple/Tripel ufkläre:

Double und Imperial meint eigentlech zgliche, het aber zwöi verschideni Härkünft. Z Imperial chunnt eigentlech vom Russian Imperial Stout, auso dr sterkere Variante vom ne Stout, wo ursprünglech für d Zarin Katharina isch braut worde. Double chunnt eher vom amerikanische Double IPA, was eifach e stercheri Variante vom ne IPA isch (öppe 7.5-10%). Es git aber durchus Brauerei wo ihres starke IPA es Imperial IPA nenne, oder ihres starke dunkle es Double Stout (eher säute).

Die wo när gfunge hei, si gheie no viu meh Mauz u Hopfe i ihres Bier, damits über 10% het, heis afa Triple IPA nenne. I mine Ouge isch abr es Double IPA gäge obe offe, vo däm här machts ke Sinn. Füehrt sondern sogar eher zu Verwirrig odr zure Verwächslig mitem beugische Tripel (gäu Etter ).